Aadan Yabaal, Soomaaliya – Ciidamada Qalabka Sida ee Soomaaliya oo kaashanaya Taliska Mareykanka ee AFRICOM ayaa xalay fiidkii fuliyay howlgal qorsheysan oo ka dhacay degmada Aadan Yabaal ee gobolka Shabeellaha Dhexe, si looga hortago khatarta kooxda Al-Shabaab.
Howlgalka oo lagu beegsaday goob ay kooxdaasi isku uruursanayeen, una adeegsanayeen gabbaad iyo qorsheyn weerarro, ayaa lagu dilay 12 xubnood oo ka tirsan Al-Shabaab, sida ay sheegayaan xogaha hordhaca ah ee la helay.
Saraakiisha ammaanka ayaa xaqiijiyay in duqeyntan si taxadar leh loo fuliyay, ayna u suurtagashay in lagu beegsado bartilmaameedkii loo dan lahaa iyadoo aanay jirin wax khasaare ah oo soo gaaray dadka rayidka ah ee ku nool deegaanka.
Howlgalkan ayaa qeyb ka ah dadaallada joogtada ah ee dowladda Soomaaliya iyo saaxiibada caalamka ay ku xoojinayaan la-dagaallanka argagixisada, si loo xaqiijiyo amni waara iyo xasilooni guud oo dalka ka hirgasha.
