Beledweyne – Ciidanka Hay’adda Sirdoonka iyo Nabadsugidda Qaranka (NISA) oo kaashanaya saaxiibada caalamiga ah ayaa xalay fuliyay howlgal qorshaysan oo ka dhacay Isgoyska Gaycad ee deegaanka Mabaax, Gobolka Hiiraan, kaas oo lagu dilay 13 xubnood oo ka tirsan maleeshiyaadka Khawaarijta.
Sida lagu sheegay war-saxaafadeed rasmi ah oo kasoo baxay NISA, howlgalka ayaa lagu beegsaday goob maleeshiyaadku isku abaabulayeen, si ay weerarro iyo falal dhagar ah ugu maleegaan shacabka Soomaaliyeed. Howlgalka oo la fuliyay laba weji oo is xigta ayaa lagu burburiyay hub iyo agab ciidan oo ay Khawaarijtu halkaasi ku diyaarsanayeen.
NISA ayaa xustay in xubnaha la dilay ay kamid ahaayeen firxad hore uga badbaaday howlgaladii hore ee lagu qaaday deegaanka, kuwaas oo markale isku dayay in ay abaabulaan dhagaro ka dhan ah shacabka Soomaaliyeed.
War-saxaafadeedka ayaa lagu adkeeyay go’aanka Hay’adda Sirdoonka iyo Nabadsugidda Qaranka ee ah in aysan wax nasasho ah siin doonin Khawaarijta meel kasta oo ay dalka kaga dhuumanayaan, isla markaana ay sii wadayaan beegsiga firxadkooda iyo horjoogayaashooda si loo sugo amniga dalka loogana badbaadiyo shacabka falalka argagixisanimo ee cadawga Khawaarijta.
NISA ayaa mar kale u xaqiijisay shacabka Soomaaliyeed in ay ka go’an tahay difaaca dalka iyo ciribtirka Khawaarijta meel kasta oo ay isku dayaan in ay kaga dhibaateeyaan shacabka.
