Tel Aviv, Israa’iil – Wararka laga helayo dhinaca Israa’iil ayaa xaqiijinaya in Ra’iisul Wasaaraha dalkaasi, Benjamin Netanyahu, uu ugu dambeyn aqbalay talo ka timid Madaxweynaha Mareykanka, taasoo ahayd in la qaato heshiiska xabbad-joojinta, kaddib isku day uu sameeyay saacadihii ugu dambeeyay ee maanta si uu uga aargoosto duqeyntii ay subaxnimadii hore Iiraan ku beegsatay bartilmaameedyo ku yaalla gudaha Israa’iil — weerar ka dhacay wax yar ka hor inta aan la guda gelin xabbad-joojinta la qorsheeyay.
Sida ay warbaahinta gudaha Israa’iil sheegtay, Madaxweyne Donald Trump oo markale xafiiska la wareegay horraantii sanadkan, ayaa si toos ah u la xiriiray Netanyahu, isaga oo ku cadaadiyay in uu si degdeg ah u hirgeliyo heshiiska xabbad-joojinta, si loo joojiyo dagaalka sii xoogeysanaya ee u dhaxeeya Israa’iil iyo Iiraan.
Madaxweynaha Turkiga oo Ku Baaqay Deganaan
Dhinaca kale, Madaxweynaha Turkiga, Recep Tayyip Erdoğan, ayaa si kulul uga hadlay xaaladda cakiran ee Bariga Dhexe, isaga oo ugu baaqay labada dhinac — Israa’iil iyo Iiraan — in ay u hoggaansamaan xabbad-joojinta lagu heshiiyay. Madaxweyne Erdoğan ayaa tilmaamay in Bariga Dhexe aanu sii qaadi karin dagaal baaxaddiisu intaas le’eg tahay, taasoo saameyn ballaaran ku yeelan karta guud ahaan nabadda iyo xasilloonida caalamka.
Banaanbax Guul Lagu Sheegtay oo Ka Dhacaya Tehran
Warbaahinta dowladda Iiraan ayaa ku dhawaaqday in caawa fiidkii uu magaalada Tehran ka dhacayo banaanbax weyn oo loogu magac daray “banaanbaxii guusha.” Banaanbaxan ayaa lagu sheegay mid muujinaya taageerada shacabka ee weerarkii ay ciidamada Iiraan ku qaadeen Israa’iil, iyadoo shacabka lagu casuumay inay si weyn uga qeybgalaan si ay u muujiyaan midnimada iyo ad-adayga qaranka.
Heshiiska xabbad-joojinta ee la oggolaaday ayaa imaanaya xilli xiisadda u dhaxeysa Israa’iil iyo Iiraan ay gaartay heer aad u sarreeya, taasoo sare u qaaday cabsi laga qabo in dagaalka uu u gudbo xuduudaha labada dal, kana dhaco dagaal ballaaran oo goboleed. Beesha caalamka ayaa si weyn u taageertay xabbad-joojinta, iyadoo loogu baaqayo labada dhinac in ay fursaddan uga faa’iideystaan dejinta xiisadda iyo wada-hadallo nabadeed.
