Hargeysa, Somaliland – Madaxweynaha Jamhuuriyadda iskeed ugu dhawaaqday madaxbannaanida ee Somaliland, Mudane Cabdiraxmaan Maxamed Cabdilaahi (Cirro), ayaa maanta si rasmi ah uga daahfuray magaalada Hargeysa Shirweynaha Qaran ee la dagaalanka maydhaanka lacagaha sharci darrada ah.
Munaasabaddan oo muhiim u ah xoojinta daahfurnaanta nidaamka maaliyadeed iyo la dagaallanka musuqmaasuqa, ayaa waxa madaxweynuhu ka jeediyey khudbad dhaxalgal ah oo dhinacyo badan taabanaysa. Madaxweyne Cirro ayaa carrabka ku adkeeyey in xukuumaddiisu ka go’an tahay in la ilaaliyo, lana kobciyo, nidaam maaliyadeed oo waafaqsan heerarka iyo shuruucda caalamiga ah, kuna saleysan hufnaan iyo isla xisaabtan.
“Dastuurka Somaliland ayaa na faraya ilaalinta ammaanka qaranka, hirgelinta suuqa xorta ah, dhiirrigelinta maalgashiga gudaha iyo dibadda, iyo xaqiijinta daahfurnaanta iyo isla xisaabtanka,” ayuu yiri Madaxweyne Cirro. “Sidaas darteed, la dagaalanka maydhaanka lacagaha iyo ka hortagga maalgelinta argagixisada waa waajib sharci ah oo aynu wada leenahay.”
Madaxweynuhu wuxuu hoosta ka xarriiqay in xukuumaddiisa ay si weyn u danaynayso horumarinta tayada maamulka maaliyadeed, xoojinta hanti-dhawrka guud, iyo in la dardar geliyo soo saarista warbixino joogto ah oo muujinaya xaaladda maaliyadeed ee dalka iyo heerka u hoggaansanaanta siyaasadaha iyo shuruucda maaliyadda.
Madaxweyne Cirro ayaa sidoo kale ugu baaqay dhammaan hay’adaha dowladda, shirkadaha gaarka loo leeyahay, iyo muwaadiniinta Somaliland in ay si wadajir ah uga qeybqaataan dadaallada lagu sugi karo nidaam maaliyadeed oo caddaalad ku dhisan, kana madax bannaan falal sharci-darro ah.
“Waa in aynu dhammaanteen u hoggaansanaa mabaadii’da daahfurnaanta iyo isla xisaabtanka. Waa inaan hubinnaa in nidaamkeenna maaliyadeed uu ku saleysan yahay maamul wanaag iyo kalsooni ay bulshada iyo beesha caalamkuba qabaan,” ayuu hadalkiisa ku soo gabagabeeyey Madaxweynaha Somaliland.
Shirweynahan ayaa la filayaa inuu horseedo go’aano wax ku ool ah oo lagu xoojinayo awoodda Somaliland u leedahay la dagaallanka dhaqaalaha sharci darrada ah, si loo sugo horumarka dhaqaale ee dalka.
