Kulanka Golaha Wasiirrada oo ka dhacay magaalada Jowhar, caasimada HirShabelle waxaa caawa shir-guddoomiyay Madaxweynaha Dowladda Goboleedka HirShabelle Mudane Cali Cabdullaahi Xuseen (Cali Guudlaawe) waxaana diirrada lagu saaray dagaalka Al-Shabaab lagaga ciribtirayo guud ahaan Hirshabeelle.
Wasaaradda Amniga ayaa faahfaahin ka bixisay xaaladda amni ee guud ahaan Hirshabeelle, waxana ay tilmaamtay in saacadihii ugu dambeeyay guulo waa weyn laga gaaray Al-Shabaab.
Sidoo kale Wasaaradda ayaa xustay inay dagaalka ay ku biireen ciidamada Daraawiishta Hirshabeelle qeybna ay ka ahaayeen howgalka Ciidamada Xoogga Dalka iyo kuwa deegaanka.
Shirka ayaa lagu gorfeeyay isbeddelka cimilada iyo abaaraha ku dhuftay deegaanada qaar ee Hirshabeelle kuwaasoo saameyn xoog leh ku yeeshay xoolaha iyo beeraha
Wasaaradda Arrimaha Guddaha iyo Dowladdaha Hoose ayaa la wadaagtay Golaha Wasiirrada qaabka ay u dhacday doorrashada Golaha Deegaanka ee degmada Mahadaay iyo sida ay iminka ugu howlan yihiin doorrashada Golaha Deegaanka ee degmada Balcad.
Shirka Golaha Wasiirrada ayaa lagu ansixiyey degmo-nimada Biyo-cadde oo ay soo gudbisay Wasaaradda Arrimaha Gudaha iyo Dowladdaha Hoose.
Wasaaradda Qorsheynta iyo Iskaashiga Caalamiga ah ayaa Golaha u soo gudbisay saameynta xanibaada dibadda ee Hay’adda USAID oo mashaariic kala duwan ka waday Hirshabeelle.
