War qoraal ah oo ka soo baxay xafiiska Hay’adda Sirdoonka iyo Nabadsugidda Qaranka (NISA) ayaa lagu sheegay in hey’adda iyo Saaxiibada caalamka oo is kaashanaayo ay si wada jir ah u fuliyeen howlgal qorsheysan kaasoo ka dhacay deegaanka Ugunji ee gobolka Shabeellaha Hoose ee koonfurta Somaliya, waxaana weerarka lagu dilay xbin sare oo ka tirsanaa dagaal yahanada Al-Shabaab.
Sarkaalka la dilay ayaa lagu magacaabaa Maxamed Cabdi Dhiblaawe Afrax, iyadoo sidoo kale uu lahaa magacyada afgarashada ee (Khaalid Dheere, Khaalid Dacas, Macallin Siciid, Timo-jilac iyo Maxamed Sahal).
Xubintan sare ee la dilay ayaa sida NISA ay sheegtay ahaa maskaxdii ka dambaysay qaraxii ka dhacay Isgoyska Ceel-gaabta kaas oo lagu weeraray kolonyada Madaxweynaha Somaliya, 18-kii Maarso 2025, waxaana bayaanka lagu shegay in lasoo afjaray howlgal si guul ah kaasoo bartilmaameedkiis ahaa oo lagu beegsaday Gaari Noah ah oo ay saarnaayeen xubinta sare ee Al-Shabaab iyo xubno kale ee la socday.
