Brasilia – Wasiir ku-xigeenka Wasaaradda Beeraha iyo Waraabka ee Dowladda Federaalka Soomaaliya, Marwo Sahra Yuusuf Ige, ayaa si rasmi ah uga qaybgalay Shirka 2-aad ee Wadahadalka u dhexeeya Brazil iyo Afrika, kaas oo diiradda lagu saarayay arrimaha la xiriira sugnaanta cuntada, la dagaallanka gaajada, iyo horumarinta miyiga.
Shirkan heerkiisu sareeyo oo lagu qabtay magaalada caasimadda ah ee Brasilia, dalka Brazil, ayaa socday intii u dhaxaysay 20–22 May 2025, waxaana ka soo qaybgalay wufuud ka kala socotay dowlado Afrikaan ah, hay’ado caalami ah, iyo ururo horumarineed.
Kulanka ayaa lagu falanqeeyay sidii loo xoojin lahaa iskaashiga Afrika iyo Brazil ee dhinacyada teknoolojiyadda, cilmi-baarista, iyo hirgelinta siyaasado wax ku ool ah oo wax looga qabanayo caqabadaha la xiriira gaajada, saboolnimada, iyo horumar la’aanta miyiga.
Marwo Sahra Yuusuf Ige ayaa kulanka ka jeedisay hadal ay ku muujisay muhiimadda ay leedahay iskaashi dhab ah oo u dhexeeya dalalka Afrika iyo waddamada sida Brazil u leh waayo-aragnimo dhanka wax-soo-saarka iyo siyaasadaha cunto-abuurka, si loo gaaro mustaqbal ka madax bannaan gaajo iyo saboolnimo.
Dowladda Federaalka Soomaaliya ayaa dadaal ku bixineysa sidii loo xoojin lahaa wax-soo-saarka gudaha, gaar ahaan dhanka beeraha iyo horumarinta miyiga, iyadoo kaashanaysa fursadaha iskaashi ee heer gobol iyo mid caalami ah.
